Notice: Array to string conversion in /home/vmnews/domains/vartmanmaharashtra.in/public_html/wp-includes/shortcodes.php on line 356

मतांच्या गोंधळाचा फटका कोणाला?

Array



म. टा. प्रतिनिधी,

‘पीएमआरडीए’च्या पुणे महानगर नियोजन समितीच्या सदस्यपदासाठी निवडणुकीसाठी मोठ्या नागरी मतदारसंघात आज, बुधवारी झालेल्या मतदानात अनेक गोंधळ पाहावयास मिळाले. पुणे आणि पिंपरी-चिंचवड महापालिकेतील नगरसेवकांची मते फोडण्याबरोबरच काही मते बाद होणार असल्याची प्रतिक्रिया राजकीय वर्तुळातून व्यक्त होत आहे. त्यामुळे या गोंधळाचा झालेला फटका हा राष्ट्रवादी काँग्रेस किंवा भारतीय जनता पक्षाला बसण्याची शक्यता आहे.

त्याच वेळी काँग्रेसची मते फुटली आणि त्यांनी मतांचा कोटा पूर्ण न केल्यास त्यांच्या उमेदवाराला थेट पराभव पत्करावा लागण्याची शक्यता असून, हे चित्र शुक्रवारी मतमोजणीनंतरच स्पष्ट होईल.

पुणे महानगर प्रदेश विकास प्राधिकरणाच्या (पीएमआरडीए) ३० सदस्यपदांसाठी बुधवारी मतदान झाले. पुणे आणि पिंपरी-चिंचवड या मोठ्या नागरी मतदारसंघातून त्यापैकी २२ जागा लढविण्यात येत आहे. या २२ जागांसाठी निवडणुकीच्या रिंगणात २३ नगरसेवक असून, त्यातील १४ जण पुणे महापालिकेतील आहेत. उर्वरित नऊ उमेदवार पिंपरी-चिंचवड महापालिकेतील आहेत. या निवडणुकीत झालेल्या मतदानानुसार निवडून येण्यासाठीचा कोटा निश्चित होणार आहे. दोन्ही महापालिकांत झालेले मतदान पाहता पहिल्या पसंतीचा ११ मतांचा कोटा निवडून येण्यासाठी निश्चित होईल, अशी शक्यता आहे.

या पार्श्वभूमीवर पुणे भाजपने आपल्या उमेदवारांना निवडून आणण्यासाठी केवळ पहिल्या पसंतीचीच मते दिली आहेत, तर पिंपरी-चिंचवड महापालिकेतील भाजपच्या नगरसेवकांनी पहिल्या पसंतीसह दुसऱ्या पसंतीसाठीही मतदान केले आहे. त्यामुळे दोन्ही महापालिकांतील भाजपचे उमेदवार निवडून येतील, असा दावा त्यांच्याकडून करण्यात येत आहे. राष्ट्रवादी काँग्रेसने सर्व उमेदवारांना पहिल्या पसंतीचे कोट्यानुसार मतदान केले आहे. इतर पसंतीक्रमानुसार एका नगरसेवकाने १४ उमेदवारांना मतदान केले आहे. शिवसेनेकडे कोट्यानुसार पुरेशी मते असल्याने त्यांच्या उमेदवाराचा विजय निश्चित समजला जातो.

काँग्रेससमोर त्यांची मते राखण्याचे आव्हान होते; शिवाय कोटा पूर्ण करण्यासाठी इतर मतांची आवश्यकता होती. ही मते जुळविण्यात यश आल्याचा काँग्रेसचा दावा आहे. मात्र, काँग्रेसची काही मते फुटली असल्याचे इतर पक्षांकडून खासगीत सांगण्यात येत आहे. या पार्श्वभूमीवर काँग्रेसने दिलेली लढत ही भाजप आणि राष्ट्रवादी काँग्रेसची काळजी वाढविणारी ठरली आहे. राष्ट्रवादी काँग्रेसने पुणे आणि पिंपरी चिंचवड येथील बाहेरील पक्षातील प्रत्येकी एक मत मिळविल्याची चर्चा आहे. त्यामुळे ही निवडणूक अत्यंत चुरशीची झाली असल्याचे चित्र महापालिकेत उमटले आहे.

कोटा पहिल्या पसंतीचा

पुणे महानगर नियोजन समितीच्या सदस्यपदासाठी निवडणुकीसाठी मोठ्या नागरी मतदारसंघात २२ जागा असून, २३ उमेदवार निवडणुकीच्या रिंगणात आहेत. पहिल्या शक्यतेनुसार कुठल्याही एका उमेदवाराने पहिल्या पसंतीचा कोटा पूर्ण न केल्यास तो मतमोजणीतून बाद होणार आहे. परिणामी इतर २२ उमेदवार निवडून येतील. दुसऱ्या शक्यतेनुसार एक किंवा एकाहून अधिक उमेदवारांनी पहिल्या पसंतीचा कोटा पूर्ण न केल्यास दुसऱ्या पसंतीची मते मोजली जातील. त्यात खरी चुरस असणार आहे.



Source link

Latest articles

Related articles

Leave a reply

Please enter your comment!
Please enter your name here