जिल्ह्यातील संसर्गात घट


म. टा. प्रतिनिधी, पुणे

जिल्ह्यातील करोनाबळींची संख्या शून्यावर येत असतानाच ग्रामीण भागातील हॉटस्पॉट गावांची संख्याही दोन आठवड्यांत ७६ वरून ३४ पर्यंत घसरली आहे. ३४ पैकी २४ गावांमध्ये अद्याप संसर्ग कमी होत नसल्याने त्याकडे आरोग्य विभागाने अधिक लक्ष देण्याचे ठरवले आहे.

जिल्ह्यात आंबेगाव, शिरूर आणि जुन्नर तालुक्यांत सर्वाधिक हॉटस्पॉट गावे आहेत. त्याखालोखाल दौंड, खेड, हवेली आणि मुळशी तालुक्यातील गावे हॉटस्पॉट आहेत. इंदापूर, पुरंदर, बारामती, भोर, मावळ आणि वेल्हा तालुक्यात एकही गाव हॉटस्पॉट नाही.

पुण्यात ऑगस्टपासून करोनाचा संसर्ग कमी होत आहे. त्यापाठोपाठ आता जिल्ह्याच्या ग्रामीण भागातही संसर्गाचा वेग कमी होत आहे. मार्च-एप्रिलमध्ये हॉटस्पॉट गावांची संख्या मोठी होती. या पार्श्वभूमीवर जिल्हा परिषदेसह आरोग्य विभागाच्या वतीने ग्रामीण भागात विशेष लक्ष केंद्रीत करण्यात आले होते. त्यामुळे गेल्या काही महिन्यांत हॉटस्पॉट गावांची संख्या घटत चालली आहे.

जिल्ह्यातील दहापेक्षा अधिक रुग्ण असलेल्या गावांना हॉटस्पॉट म्हणून निवडले जाते. त्यानंतर संबंधित गावांवर लक्ष केंद्रीत करण्यात येते. जिल्ह्यातील तेरापैकी सहा तालुके हॉटस्पॉटमुक्‍त झाले आहेत. सात तालुक्यांतील गावांमध्ये हॉटस्पॉट असून, चार तालुक्‍यांतील हॉटस्पॉट गावांची संख्या पाचच्या आत आणि तीन तालुक्‍यांतील हॉटस्पॉट गावांची संख्या दहाच्या आत आहे. एप्रिलमध्ये जिल्ह्यात संसर्गाची तीव्रता अधिक होती. त्या वेळी जिल्ह्यात ४६५ गावे हॉटस्पॉट होती. मे महिन्यातील हॉटस्पॉट गावांची संख्या ३९७ वरून जूनमध्ये १८६ वर आणि जुलैमध्ये १०३ पर्यंत घसरली.

दोन आठवड्यापूर्वी ग्रामीण भागात ७६ गावे हॉटस्पॉट होती. सद्यस्थितीत त्यातही घट झाली असून, जिल्ह्यातील ३४ गावे हॉटस्पॉटमध्ये मोडतात. त्यातच नव्याने १० गावांमध्ये हॉटस्पॉट तयार झाला आहे. उर्वरीत २४ गावांमध्ये सातत्याने करोनाचा संसर्ग आढळत आहे. हॉटस्पॉट गावांमध्ये पुरंदर तालुक्यातील दिवे, आंबेगावधील चांडोळी बुद्रुक, खडकी, दौंडमधील पाटल, वडगाव दरेकर, यवत आणि हवेली तालुक्यातील नऱ्ह्याचा समावेश आहे. त्याशिवाय शिरूर तालुक्यातील इनामगाव, कवठे यमाई या गावांचाही समावेश आहे.

अशी घटली हॉटस्पॉट गावे

महिना गावांची संख्या

एप्रिल ४६५

मे ३९७

जून १८६

जुलै १०३

ऑगस्ट ९५

सप्टेंबर ८३

ऑक्टोबर ७६

नोव्हेंबर ३४



Source link

Latest articles

Related articles

Leave a reply

Please enter your comment!
Please enter your name here